قرر حسبان الرئيس ديال الرجاء أنه استغل المباراة ديال الفريق ديالو أمام حسنية أكادير، باش اطبع عدد كبير من التذاكر، باغي ادخل لفلوس باش اخلص اللاعبين والموظفين، لكيتسالو أكثر من 5 أشهر، ديال الرواتب. وقرر حسبان اطبع 35 ألف تذكرة،خصوصا أن الماتش مهم بزاف لأن الحسنية كتحتل المركز الأول والرجاء المركز الثاني، وفي حال فاز الرجاء غادي اولي في المركز الأول، داكشي علاش المباراة غادي تعرف حضور جماهيري كبير لمحبي وأنصار الفريق الأخضر. واستغل حسبان الأهمية ديال المباراة باش اطبع عدد تذاكر كثر من لطبعهم في الماتش الأخير ديال شباب أطلس خنيفرة لطبعوا فيه 29 ألف تذكرة. وهادشي علاش حسبان حيح البارح على كازا إيفنت، ورفض اخليهم اسدوا مركب محمد الخامس من بعد المباراة ديال الوداد، وألح على أنه العب في دونور، باش احضر الجمهور بكثافة واستافد من مداخيل مهمة. وغادي احاول الرجاء افوز بالمباراة باش اولي في الصدارة ديال الدوري الاحترافي لكرة القدم، لأن الفرق ديال النقاط بينهم وبين الحسنية غير 2 ديال النقاط فقط.
