رونار مبقاش غادي ادير دويرة فأوروبا

الثعلب الفرنسي رونار مبقاش غادي امشي لأوروبا باش اتلقى بلاعبي المنتخب الوطني، كيفما كان مقرر من قبل،لأنه لقى راسو مشغول مع المنتخب المحلي، لكاين فتونس دابا.
رونارد كان باغي امشي لأوروبا باش اطيب لخواطر وهضر مع اللاعبين باش ميبقاوش مقلقين مع حكيم زياش، لاعب فريق أجاكس امستردام، لقرر ارجع للمنتخب بعد جلسة الصلح مع المدرب الفرنسي.
المدرب الفرنسي خايف من الصداع بين اللاعبين في الماتش ديال مالي، لغادي العبوه الأسود في فاتح شتنبر بمركب مولاي عبد الله، داكشي علاش كان باغي لأوروبا باش اهضر مع اللاعبين ديالو، ولكن لأنه مشغول مع المنتخب المحلي، لربح البارح المنتخب الليبي بخمسة أهداف لواحد، في إطار الاستعدادات ديالو للمباراة المهمة أمام المنتخب المصري المحلي.
ولأن الوقت مبقاش لرونارد باش امشي لأوروبا قرر ابقى مع المنتخب المحلي بتونس، وغادي اسافر معاهم لمصر، باش اتبع الماتش، وغادي ارجع للمغرب باش ابدى اوجد للماتش المهم للأسود أمام مالي، لكيدخل في التصفيات ديال كأس العالم 2018.