ها علاش عيوش داير هاد الخرجات. كاليك باغي يرجع "ائتلاف الديموقراطية والحداثة" وكيقلب علي شكون يحطو فالواجهة

خرجة نور الدين عيوش الاخيرة سوا باش يهدر على الريف ولا ينقط بغباء كبير السياسيين ماشي اعتباطية. مول الاشهار عارف وقتاش يخرج وعلاش. ظاهريا الريف غير مقدمة باش يعاود يحيي الائتلاف اللي كان دارو مع الراحل عبد الرحيم الهاروشي ف2004 "ائتلاف الديموقراطية والحداثة". بحال كاع مبادراته غير كيطلقهم ويستافد منهم وتختفي هاديك المبادرات. تبعوه وشوفو اش دار وفين وصل داك الشي اليوم.
حسب ما علمته "كود" فانه كيقلب على شكون ياخد الرئاسة ظاهريا ودار اتصالات وفشلات. السيد باغي يبقى فالضو. حقاش بلاه يقدر يموت. كيفاش هاد الشخص باغي يدافع على الديموقراطية وهو كان كيدعم البام فالحملة الاخيرة وعارف كيفاش دازت الحملة وباللي الديموقراطية كلات لعصا بزاف. كيفاش يدفع على الحداثة وهو كيخرج غير فالمناسبات باش يدافع على مواضيع ينتاقيهم بعناية. هاد الشي اسمو الاشهار ماشي الالتزام بقضايا المجتمع