الصعرة ناضت فالحسيمة. التدخل بالعنف بالغازات المسيلة للدموع والمدينة تقسمات لمربعات باش ما تلاقاش مسيرة مع اختها ونوال بنعيسى فالصبيطار

هاديك الاجواء اللي نقلاتها ليكم "كود" قبيلة على التدخل الامني بلا عنف ما بقاتش دابا. فمدينة الحسيمة محاصرة كليا. الخطة اللي عايناتها "كود" هي كالاتي. المدينة تقسمات مربعات وكل مربع كتحاصرو القوات العمومية وما كتخليهش يحتج. بهاد الشي كتحاول هاد القوات الضغط باش المحتجين ما يتلاقاوش مع بعضياتهم وتولي مسيرة كبيرة. فهاد الخطة كاين استعمال الغازات المسيلة للدموع باش اللي فشي درب يبقى فيه واللي فشي دار ما يخرجش منها٬ كما تم استعمال القوة مع اللي ما بغاش يستاجب.
الان حنا محاصرين بالقنابل ومهنة صحافي ما كنفعك فوالو. المدينة تغيرات بشكل كبير علي كيف كانت هادي ساعة.
عاينت "كود" مشاهد فشي شكل غادية تنقلها من بعد باش يرجع الانترنيت بالصورة والفيديو. من اخر ما وقع هو نقل الناشطة نوال بنعيسى فسيارة الاسعاف الى المستشفى بعد اختناقها بسباب القنابل المسيلة للدموع.