كون تحشم يا الغشاش فالامتحانات. رئيس جماعة ماعندوش علاش يحشم وكيقول ان المنتخبين هوما لي يهضرو فالاجتماع مع لفتيت (فيديو)

رئيس جماعة بوعرك بالناظور لي حصلوه كيغش فالامتحانات فالجامعة العام لي فات وعلقو سميتو كغشاش فالطارلو، ماعندوش علاش بحشم.
هاد السيد لي عمرو فتح فمو خلال الحراك وقال كلمة زينة ناض اليوم فالاجتماع مع لفتيت باغي يستفرد بالكلام من بعد ما قال لفتيت ان كل واحد سواء منتخبين او فعاليات مدنية ياخذو جوج دقايق ديال الهضرة.
السيد معجبوش الحال وناض كيقول اننا منتخبين ومانعرف اشنو وهوما ينوضو ليه النشطاء لي كانو فالقاعة حيحو عليه وهو يسد دلقوشو.
كون كنتي تحشم غاتعرف ان وزير الداخلية ماجاش عندك ونتا غير ديكور يؤثثون بيك الجلسة الوزير جا لعند الساكنة باش يسمع ليها ونتا واللي بحالك هوما سباب مصائب الدولة.