شاعلة: بعدما منع ترامب الايرانيين .. ايران ترد و تعلن حظر سفر الامريكيين ليها

—
بعدما منع ترامب مواطني سبع ديال الدول يدخلو ميريكان وخا عندهم فيزا ،وبداو السلطات ف المطارات كايمنعو هاد الناس بحال اليوم ملي مطار كينيدي رجع جوج عراقيين لطيارتهم، يالاه دابا واحد نص ساعة باش ردات ايران على قرار ترامب و تا هي قررات تمنع الميريكانيين يدخلو البلاد.
وكالة رويترز قالت ان وزير خارجية ايران قال بلي ايران عارفة الفرق بين الحكومة الميريكانية و الشعب الميركاني و لكن الله غالب ، هاد ترامب ماخلا لينا والو بهاد السياسة ديالو.
الدول اللي منع ترامب هي سوريا و ايران و العراق و السودان و الصومال و ليبيا و اليمن، وجا ف القرار انه وخا مواطني هاد البلد عندهم جنسية امريكية ولا جنسية بلد اخر وخا يكون عندهم فيزا مايدخلوش. و ايران على حسب شي معلقين كاتدير غير المعاملة بالمثل اللي هي مبدأ ف الديبلوماسية.
وللتوضيح شي خبراء ف السياسة الميريكانية قالو بلي قرار ترامب منع دخول هاد الناس راه مؤقت و محدود ف 90 يوم فقط، وهو الوقت الكافي باش تبدل السفارات و القنصليات سياستها ف منح الفيزات و اجراءات الهجرة .