العدالة والتنمية وفرسان الاصلاح والمجاهرة بدعم الارهاب والقتل: بغينا موقف صريح بحال موقف ديال عدم الخروج للتظاهر درءا للفتنة أو راه ديما غنعتابروها محسوبة عليكم

الصراحة مكانتش مفاجئة كبيرة أن بزاف ديال المغاربة عتابروا قاتل السفير الروسي غدرا من الظهر بطل وشهيد ورجل في زمن قلة فيه الرجال ، ونتاشروا العديد من المناشير لي كتشيد بهاد السيد وبالشجاعة ديالو وقوة الّإيمان وخدمته للقضية وغيرته على أطفال حلب ، هادشي كثر عندنا وبزاف ديال الناس مآمنين بيه ، ولكن الغريب هو تشوف صفحة فرسان الإصلاح لي كانت فرسان العدالة والتنمية ومن بعد ما تبرأ منهم بنكيران ووصفهم بالمداويخ وأصبحوا فرسان الإصلاح " إصلاح آش الله وعلم " كيخرجوا فمنشورين للإشادة بقاتل السفير التركي ، هاكاك عين بين كأنهم مكيديروش السياسة .
إييه كولشي عارفكم كتفكروا هكاك وبالنسبة ليكم هاداك بطل وشهيد ، ولكن راكم كتديروا السياسة زعمة راه ضروري شي شوية من الذكاء والتقية ، ماشي تخرجوا ليها عين بين فتحدي واضح لموقف الدولة من الأمر ، ومن بعد نشر كود لخبر حول هاد جوج تدوينات وكيفاش أنهم كيشيدوا بعمل إرهابي ، ألا وهو قتل سفير دولة غدرا ، ناضوا بدلوا التدوينات ديالهم ومسحوا لقدام وغيروهم بما يليق فاللباقة السياسة، الموشكيل هو أن كود تاصلات بقيادة حزب لامبة وتبرؤو من الصفحة وأعلنوا عدم مسؤوليتهم على ما ينشر فيها ، ولكن من بعد الإتصال ونشر الخبر تم حذف التدوينتين وتغييرهما بتدوينات أقل إشادة ، إلا كانوا بصح خدامين منهم لراسهم فراه مكانوش غادي يبدلوا التدوينات كانوا غيبقاو .
للأسف هاد الصفحة المتتبعين ديالها كثار ومنشوراتها فالغالب تحريضية ، وبزاف من المنتمين لحزب لامبة ناشطين فيها ، وديما من ورا شي هيلالة أو خروج شي فضيحة ديالها كينوض شي قيادي فالحزب كيتبرء منها ، ولكن كيتم حذف ما تمت إدانته دقائق بعد هاد التبرؤ منها ، بغينا غي نعرفوا واش بصح الى مكانتش هاد الصفحة تابعة لشي حد فالعدالة والتنمية علاش مايخرج قرار من الحزب باش تاواحد منتامي للحزب أو متعاطف معاه مايبقى فيها ، كيما خرجوا قرارات ديال تاواحد مايخرج نهار منعرف شنو ، تجنبوا الفتنة المغرب في خطر ، راه حتى هاد الصفحة تتير الفتنة فالمغرب ، وتشيد بالإرهاب وكيبان ولائها للقضايا الأجنبية كثر من ولائها لهاد البلاد ولمواقفها ، التبرؤ من الصفحة مكافيش لحد الآن وغير مقنع ، مادامت النهار وماطال تهلل للحزب ولقيادييه وتنتقد معارضيه ولي مامتفاهمينش معاه ، بغينا موقف صريح بحال موقف ديال عدم الخروج للتظاهر درءا للفتنة أو راه ديما غنعتابروها محسوبة عليكم .