مرحموش شيباتهم..عصابة سرقات بيت كوبل كبار في السن بالنواصر وهاكيفاش تعداو عليهم

وخا ناس كبار والراجل فايت الثمانين، ومرتو في نهاية السبعينات، هادشي مخلاش عصابة تحشم على عاراضها وهي كتقحم دار زوجين عجوزين بجماعة ولاد صالح بالنواصر، بداية الأسبوع الجاري.

هاد العصابة المكونة من 3 أفراد حسب تصريحات الزوجين، دخلو عليهم وشبعوا فيهم عصا وربطوهم، وقلبو على خاطرهم الدار تالقاو 8 آلاف درهم عاد مشاو.

تال النهار الثاني عاد الزوج الثمانيني قدر فك الحب الذي ربط به هو وشريكة حياته، وعيط على الجيران لي عتقوه وعيطو على الجدارمية لي قراب من دار الكوبل الضحية، وتم نقل العجوزين للمستشفى الجامعي ابن رشد للعلاج من آثار الضرب، أما الجدارمية فتحو تحقيق باش يوصلو للعصابة لي غريسات الكوبل على بعد عشرات الأمتار من مقر السرية بدون تردد أو خوف.