ولد يوعري حيح على الهلال بنجومهم: ربّح العين وضرب هاتريك تاريخي فالشومبيونزليگ

حيح الدولي المغربي سفيان رحيمي لاعب العين الإماراتي مرة اخرى، وضرب هاتريك على الهلال السعودي فماتش ألي دومي فينال دوري أبطال آسيا اليوم الأربعاء فالإمارات.
واستغل سفيان رحيمي وصحابو غياب الگول المغربي للهلال السعودي ياسين بونو اللي قرر مدرب ديالو ما يلعبوش فمغامرة كبيرة منو باش يلعب أكبر عدد من المهاجمين الأجانب، وقدر ولد يوعري والعين الإماراتي يربحو بنتيجة 4 لجوج، وماركا سفيان رحيمي 3 الأهداف من أهداف العين وجاب 2 بيلانتيات ماركا منهم 2.
وحط سفيان رحيمي والعين الإماراتي بهاد الرباح الكبير، رجلهم الأولى فالفينال ديال شومبيونزليگ، بينما يلعبو ماتش الروتور ديال الدومي فينال ضد الهلال السعودي، اللي غيكون فالعاصمة السعودية الرياض السيمانة الجاية.
وبهاد المستوى الكبير ديال سفيان رحيمي اللي كيبين ماتش ورا ماتش مع العين الاماراتي، والأهداف اللي ماركا فماتش الهلال السعودي، ولا النجم المغربي أول لاعب كيماركي هاتريك للعين فدوري أبطال آسيا من عام 2013، وأول لاعب كيماركي هاتريك على الهلال فالشومبيونزليگ من 2013.