أسود الفوتسال ل"گود" بعد اكتساحهم زامبيا: يالاه تأهلنا للدومي فينال ومازال ما درنا والو باغيين نخليو الكأس فالمغرب ونتأهلو للمونديال

عبرو لاعبين المنتخب الوطني المغربي للفوتسال على الفرحة ديالهم حيث تأهلو لدومي فينال كوب دافريك للفوتسال، بعدما ربحو زامبيا فالجولة الثالثة من دور المجموعات بنتيجة 13 لزيرو، وتكاليفاو متصدرين لگروب ب6 النقاط.
وهضر نجم المنتخب المغربي بلال البقالي فتصريح لميكرو "گود" وقال: "فرحانين بهاد الرباح والأجواء واعرة فالتيران قدام الجمهور ديالنا الكبير، وگاع اللاعبين وجدو لهاد المباراة، وركزنا من أول دقيقة حتى لآخر دقيقة وطبقنا تعليمات مدربنا، ودابا جا الوقت اللي نرتاحو فيه ونفكرو فالدومي فينال".
الگول ديال المنتخب المغربي حتى هو هضر فتصريح لميكرو "گود"، وقال: "قدرنا ندوزو للدومي فينال، ومازال ما حسمناش اللقب وغنديرو اللي علينا ونتمناو خير وحنا غنديرو كلشي باش نربحو اللقب الثالث ديالنا، ونخليوه فبلادنا ونفرحو الجماهير اللي كتجي تشجعنا فگاع الماتشات ديال كاس أفريقيا، وأي منتخب طحنا معه فالدومي فينال مرحبا به".
ووضح سفيان الشعراوي وقال حتى هو: "لعبنا بسرعة وفرضنا اللعب ديالنا، وماركينا بزاف، وباغيين نربحو كوب دافريك ونتأهلو لكأس العالم وهادشي هو أحسن حاجة وحنا وسط جمهورنا وفبلادنا".