أسود الفوتسال واجدين لزامبيا: غندخلو نربحوهم ونتأهلو حنا الأولين فالگروب والجمهور خاصو يجي للماتش حيث دورو كبير

واجد المنتخب الوطني المغربي للفوتسال، باش يلعب ضد منتخب زامبيا اليوم الاثنين فقاعة الأمير مولاي عبد الله فالرباط، الجولة الثالثة من دورة گروبات كأس إفريقيا لكرة القدم داخل القاعة، ويربح الماتش ويحسم التأهل بشكل رسمي لدومي فينال البطولة.
لاعبين المنتخب المغربي بطل إفريقيا متحمسين وواجدين لماتش زامبيا، وهذا الشي أكدو عثمان الإدريسي لاعب ليكيب ناسيونال، اللي قال فتصريح قبل المباراة: "الماتش ضد منتخب زامبيا غيكون صعيب، حيث حتى هما لاعبين على التأهل وحنا كنحاولو ندوزو بأقل الأخطاء ديالنا، وكنقلبو نربحو باش نتأهلو حنا الأولين فالكروب".
وبخصوص الأجواء داخل المنتخب المغربي، كشف عثمان الإدريسي اللي كيجي لأول مرة لليكيب ناسيونال: "حنا هنا بحال الأسرة واللاعبين المحترفين كيعاونو اللاعبين المحليين بزاف، لا هما لا اللاعبين اللي ديجا عندهم تجربة كبيرة مع المنتخب، وما كيخليوكش تحس أنك لاعب جديد أو أول مرة تجي لليكيب ناسيونال، بالإضافة للكوتش الدكيك اللي كينفعنا بزاف، وكيسهل علينا ليماتش".
أنس الدحني حتى هو اعتبر أن الماتش ضد زامبيا غيكون صعيب، وأكد فالنفس الوقت أن هذا الشي مهم للأسود باش تبقا عندهم التنافسية، ووضح: "الماتش ضد منتخب زامبيا ما غيكونش ساهل، حيث حسابيا مازال ما ضمنا التأهل، وحتى هما عندهم 3 بوان يعني حسابيا حتى هما يقدرو يتكاليفاو، والماتش غيكون صعيب، ولكن مزيان لنا باش حتى حنا نبقاو فالمنافسة ونلعبو الماتش بجدية".
وبالنسبة للدور ديال الجمهور المغربي فدعم المنتخب الوطني، أكد الدحني أنه مهم بزاف وكان عندو دور مهم حتى لدابا فكوب دافريك: "الجمهور ديالنا لعب دور كبير وجاو بزاف فالماتشات اللي فاتو، وكنشكروهم على الدعم اللي عطاونا سوا فالماتش الأول أو الثاني، وعاونا بزافك".
وكيقلب المنتخب الوطني المغربي للفوتسال حامل لقب كاس إفريقيا فالجوج مرات اللي فاتو، أنه يربح اليوم منتخب زامبيا ويحسم التأهل إلى دومي فينال كوب دافريك "موروكو 2024′′، ويرفع الرصيد ديالو إلى 9 نقاط ويدوز كمتصدر للگروب 1، بعدما ربح فالماتش الأول أنگولا والثاني غانا، ودابا كيحتل المركز الأول ب6 بوان ووراه كل من زامبيا وأنگولا ب3 بوان لكل منتخب، وغانا فالمركز الأخير بزيرو بوان.