عاجل. هادي للمغاربة اللي خداو "الاقامة الذهبية" فالصبليون بشراء ديور. سانشيث: غادي نلغيو هاد التأشيرة

اعلن پيدرو سانشيث رئيس الحكومة الصبليوني اليوم فمدينة اشبيلة عاصمة اقليم الاندلس باللي تقرر الغاء الڤيزات الذهبية للاجانب اللي كيشريو ديور او شقق. سانشيث قال "ما بغيناش استثمارات كلها مضاربة بحال هاد الموديل"
وقال سانشيث "كنعلن باللي المجلس الوزاري غادي يناقش غدا تقرير لوزير السكنى والتعمير لتعديل القانون اللي كان صادق عليه الحزب الشعبي ف2013 وللي كيعطي تأشيرة اقامة الى استثمرتي فالسكن فبلادنا" واضاف "غاديين نلغيو ما يسمى "التأشيرة الذهبية" اللي كتعطي اللي شرى دار بنص مليون اورو الاقامة فبلادنا.
رئيس الحكومة الصبليوني هاجم هاد الموديل "ماشي هو الموديل اللي محتاجينو فبلادنا. هاد المضاربات فالاستثمار فالعقار. راه دانا هاد الموديل للحيط. كرس اللا مساواة فالقطاع. حرم عدد من الشباب والعائلات من الولوج لاقتناء شقق.
حسب الحكومة فقرابة فاسبانيا عطات 10 الاف تأشيرة ذهبية بهاد الطريقة. هاد المشروع كدعمو الاحزاب المشكلة للحكومة خاصة اليسار الراديكالي "سومار"