الركراكي: يمكن المشكل فيا داكشي علاش النصيري والكعبي ما كيماركيوش وواقيلا الحب اللي غيحل البروبليم

اعترف الناخب الوطني وليد الركراكي انه كاين مشكل ديال مهاجم صريح فالمنتخب المغربي اللي يقدر يماوكي ويحول الفرص إلى اهداف، وقال انه ممكن يكون المشكل فطريقة اللعب ديالو كمدرب كثر ما هو فالمهاجمين.
وقال وليد الركراكي قبل الماتش الودي بين المغرب وموريتانيا على مشكل ال9 فالمنتخب المغربي: "كتعرفو الحب اللي عندي على يوسف النصيري وايوب الكعبي وهما بالنسبة ليا لاعبين اللي كيماركيو فالفرق ديالهم السؤال ممكن تلوحوه ليا.. كيفاش انت كمدرب ملي كيجيو للمنتخب ما كيماركيوش يمكن المشكل كيجي من عندي يمكن الضغط ديال توني المنتخب صعيب على ديال الفريق وعارفين هذا اللي تزاد فالمغرب وعاش فالمغرب وكيعرف شنو هي قيمة المنتخب ديما عندو الضغط ويمكن أنا اللي خاصني نعاونهم فالديسكور ديالي".
وكمل الركراكي وقال: "وحتى الثقة كيفما درنا مع يوسف النصيري قبل المونديال وعلاش لا ما نشوفوش لاعبين اخرين مادام كاينة المنافسة باش حتى هما ملي نعطيهم فرصة يكونو مركزين، وخاص الجمهور يعاونهم ونعطيوهم شويا ديال الحب وواقيلا الحب هو اللي غيحل المشكل ومع الخدمة والوقت فنعاونو ال9 اللي غيلعب باش يماركي".