الركراكي: المغاربة خاصهم يعاونو النصيري باش يماركي وها علاش – فيديو

كشف الناخب الوطني وليد الركراكي أن مهاجم المنتخب الوطني المغربي يوسف النصيري محتاج للدعم ديال المغاربة باش يرجع الثقة فراسو ويرجع يسجل الأهداف، وطالب الجمهور المغربي يوقف معه ويساندو.
وليد الركراكي تحدث على يوسف النصيري والتراجع فالمستوى ديالو وهادشي فالندوة الصحافية اللي كتسبق ماتش الباراغواي وقال: "النصيري محتاج ياخذ الثقة فراسو، وهذا الأمر غيخدم عليه فالنادي ديالو، وكنطلب من الجمهور المغربي يدعمو حيث هو لعاب من المنتوج المحلي باش يرجع الثقة فراسو، كيفما وقع لبنزيما اللي حتى هو كان كيلقى فبعض المرات مشكل فالتسجيل".
وشدد الركراكي فالكلام ديالو على النصيري وقال: "النصيري كيبقى ولدنا وفرحنا ملي كان كيسجل البيوت فإشبيلة واي واحد كان فرحان به، ودابا كيدوز من واحد الوقت صعيب وإذا ستاهل يلعب غيلعب وإذا ما ستاهلش ماغاديش يلعب، وحنا غنعاونوه حيث ماشي الصبليون اللي غيعاونوه راه المغاربة اللي غيساعدوه وإلى استحق يكون فكأس العالم راه غايمشي، وخاصني نعاونو حيث مازال عندو مستقبل ماشي شي لعاب اللي عندو 30 أو 32 عام، وحتى هو خاصو يخدم ويعاون راصو".