رسميا: الركراكي عيط على إبراهيم دياز ودار تغييرات فالمنتخب المغربي ها شكون طار وها شكون جا

عيط الناخب الوطني وليد الركراكي على 24 لاعب، باش يدخلو فمعسكر تدريبي استعدادا لمواجهة كل من أنگولا وموريتانيا فجوج ماتشات وديين، وفالمقدمة ديالهم نجم ريال مدريد الإسباني إبراهيم دياز.
بهذا تأكد رسميا ان إبراهيم دياز غيلعب مع المنتخب المغربي، وما بقى له غير يجي للمعسكر اللي غينطلق يوم 18 من شهر مارس، وبالإضافة إلى دياز، عيط الركراكي على أسماء جديدة باش تدعم المنتخب المغربي وكيتعلق الأمر بلاعب ريال مدريد يوسف لخديم، وإلياس بنصغيز لاعب موناكو الفرنسي، وإلياس اخوماش لاعب فياريال الإسباني.
وكتعرف لاليست ديال المنتخب المغربي، غياب الكابيتان رومان سايس لاعب الشباب السعودي، ونصير مزراوي لاعب بايرن ميونيخ الالماني، وسليم املاح لاعب فالنسيا الاسباني، وسفيان بوفال لاعب الريان القطري، حيث تراجع مستواهم، وبالمقابل رجع اشرف داري لاعب شارلوروا البلجيكي وسفيان رحيمي لاعب العين الإماراتي.