جدة دياز: براهيم اختار المغرب واخا عيطات ليه اسبانيا.. كان صعيب عليه يعزل ولكن فالاخير اختار بلاد باه

أكدت جدة إبراهيم دياز من ماماه انه قرر يلعب للمنتخب الوطني المغربي، وما غيلعبش لمنتخب اسبانيا، وعبرت على دعمها له وانها ديما غتكون وراه.
دولوريس جدة ابراهيم دياز اللي كتعيش فملگا فالصبليون، أكدت فتصريح لموقع ELDESMARQUE الإسباني ان نجم ريال مدريد غيلعب مع المغرب، وقالت: "عرفت لخبار من بنتي".
وزادت وضحت جدة دياز: "أياه عيطات له إسبانيا، ولكن هو غيلعب مع المغرب، راه باه وجداه من المغرب، وكان صعيب عليه يختار".
وكملت جدة دياز الإسبانية، وقالت: "دابا انا مع المغرب وفينما مشى براهيم غنشجعو".