آش واقع فسلا... العامل طير رئيسة قسم التعمير فوقت فضائح سوق الصالحين والخواض ديال ترحيل البرارك والبني العشوائي فالسهول وما وقع فأراضي الجموع

قرر عمر التويمي عامل عمالة سلا إعفاء رئيسة قسم التعمير خديجة (أ) من مهامها ووضعها رهن إشارة الوزارة.
وهاذ الاعفاء كان منتظر وتعطل كاع، خصوصا بعد فضيحة التلاعب بمشاريع إعادة إسكان دوار راس الما، وظهور مدينة على قدها كلها بناء عشوائي فأراضي الجموع بأولاد العياشي.
ماشي غير هاذ الشي اللي واقع فسلا كاين مشاكل أخرى بحال سوق الصالحين والبني العشوائي لجماعة السهول من فترة كورونا لدابا، خاصة وأن رئيسة القسم اللي تعفات خدمات مع بزاف ديال العمال وعندها بصمات كبيرة فتعديلات تصميم التهيئة.
رئيسة القسم اللي تعفات هي وعدد من القياد ورجال السلطة وأعوانها كلهم مسؤولين ماشي غير بوحدها على تدبير تعميري عليه ملاحظات كثيرة وكتطرح عليه الكثير من علامات الاستفهام، خصوصا هادشي لي واقع دابا فجماعة عامر والتلاعب بالمضاربة في البقع الأرضية المخصصة لدوار أولاد العياشي، واللي إلى كان صح راه خاص تكون فيه المحاسبة.
الإعفاء مع المحاسبة مطلب بعض الذين ينتقدون رئيسة قسم التعمير اللي دبرت مرحلة كتجاوز عشر سنوات فيها الكثير من المشاكل التعميرية.