الوداد على رأس الأندية المتأهلة لموندياليتو المريكان وفرق عالمية بحال البارصا والمان وميلان غايبين

تأهل لكأس العالم للأندية 2025 فالمريكان، 20 فريق حتى لدابا من بينها الوداد الرياضي، من أصل 32 فريق غيشاركو فهاد النسخة الجديدة من المسابقة، واللي غتكون مبدلة وشبيهة بكأس العالم للأمم.
وعلن الاتحاد الدولي لكرة القدم على لاليست ال20 فريق اللي تأهلو حتى لدابا لمونديال الأندية 2025، وإلى جانب الوداد الرياضي كاين كل من الأهلي المصري، والهلال السعودي، اوراوا الجابوني، وتشيلسي النگليزي، وريال مدريد الإسباني، ومانشستر سيتي النگليزي، وبايرن ميونخ الألماني والمواطن ديالو بروسيا دورتموند.
وفلاليست كاين أيضا باريس سان جرمان الفرنسي، وأنتر ميلان الطالياني، وبورتو البرتغالي، والمواطن ديالو بنفيكا، ومونتيري المكسيكي، وسياتل ساوندرز المريكاني، وكلوب ليون المكسيكي، وأوكلاند سيتي النيوزيلندي، وبالميراس وفلامينگو وفلومينينسي بثلاثة من البرازيل.
وبالمقابل كاينين فرق عالمية مازال ما تكاليفاو لموندياليتو 2025، بحال البارصا الإسباني ومانشستر يونايتد وليفربول النگلزيين، وماميلودي صن داونز والترجي التونسي، وهاد الفرق بجوج هما اللي قراب من تمثيل لافريك مع الوداد والأهلي، أما بالنسبة لأندية بحال الرجاء والزمالك المصري فمستواهم تراجع وما غيشاركوش.