قبل أيام على إعلان الركراكي لاليست الأسود.. زياش مشى يتريني فهولندا باش يرجع دغيا من الإصابة

مشى الدولي المغربي حكيم زياش لهولندا باش يكمل مرحلة الإعداد البدني ديالو، بعد مرحلة الشفاء من الإصابة اللي كانت جاتو مع المنتخب المغربي قبل شهر فكوب دافريك فالكوت ديفوار.
وبدا حكيم زياش الإعداد البدني مع واحد البريباراتور فيزيك خاص فأمستردام فهولندا، وباغي دغيا يرجع يلعب بعدما غاب لأكثر من شهر على التيرانات وعلى ماتشات گلطة سراي التركي، بسبب الإصابة اللي كانت جاتو مع المنتخب المغربي ضد زامبيا فالماتش الثالث من دور مجموعات كأس إفريقيا 2023 فالكوت ديفوار.
وبالإضافة لگلطة سراي التركي، فالجماهير المغربية حتى كتسنى واش حكيم زياش غيعط له الناخب الوطني وليد الركراكي، باش يلعب الماتشات الوديين الجوج الجايين مع المنتخب المغربي ضد كل من أنگولا وموريتانيا يوم 22 و26 مارس فأكادير.