اللبؤات: واجدين باش نربحو تونس وباغيين نتأهلو لأولمبياد باريس ونفرحو المغاربة

عبرو لاعبات المنتخب الوطني المغربي على الرغبة ديالهم فتحقيق الرباح على منتخب تونس فروتور الدور الثالث من إقصائيات أولمبياد باريس لكرة القدم النسوية، والتأهل للدور الرابع والأخير من الإقصائيات وباغيين يفرحو المغربة.
وقالت لاعبة المنتخب المغربي سكينة وزراوي فتصريح للموقع الرسمي ديال الجامعة الملكية المغربية لكرة القدم: "كنوجدو لهاد الماتش بحال گاع الماتشات، وواخا ربحنا ماتش الذهاب غندخلو باش نربحو ماتش الإياب، ونتكاليفاو للدور الجاي وعارفين أنه ماتش مهم ويقدر يفرح المغاربة كاملين وحنا غنعطيو كاع داكشي اللي عندنا فالروح والرجل فالتيران ويكون خير".
إيناس كبيدة لاعبة المنتخب المغربي حتى هي قالت: "كنوجدو لهاد الماتش مزيان، ربحنا ماتش الذهاب ودابا خدامين كنوجدو الماتش الثاني وكنشوفو الفيديوات وكنخدمو على نقاط القوة والضعف وغنديرو جهدنا كامل باش نربحو هذا الماتش باش نتأهلو للدور الأخير وللأولمبياد".