الركراكي: غياب زياش اثر علينا ضد جنوب إفريقيا وها علاش جبت مزواري وبوفال

اكد الناخب وليد الركراكي ان اصابة حكيم زياش ضد زامبيا، اثرت والغياب ديالو فماتش ثمن نهائي كوب دافريك ضد جنوب إفريقيا، اثرت على ليكيب ناسيونال، ولكن هو ما غيتخباش ورا هذا الشي.
وهضر وليد الركراكي فحوار مع قناة الرياضية، وقال: "اصابة حكيم زياش اثرت حيث هو اللي كان اللاعب الحل ديالنا وكان خاصني نخليه يرتاح، ولكن هو كان باغي يلعب وحتى أنا كنت باغي نلعبو، كنا منافقين انه يلعب غير الشوط الاول ولكن توعت قبل ما يسالي الشوط الاول بخمسة دقايق ، وبوفال توعت فالتداريب".
وكمل الركراكي، وقال: "ما فهمتش على كيهضرو على نصير مزواري، وحنا المخطط ديالنا هو يرجع نصير يلعب فالويتيام، وكون ما لعبش كانوا غيقولو علاش عيط له وهو ما واجدش، وراه وجد ولعب وراه الاصابات كاينين، وكنت حتى أنا نتخبا ونقول احسن لاعب عندي ما كانش ولكن أنا ما كنتخابش، واخا ما كاينش زياش وبوفال كاينين لاعبين اخرين وانا تايق فيهم، دابا لاعبين شباب بحال عدلي غيتعلمو وياخذو التجربة تنفع ليكيب ناسيونال فالمستقبل".
وزاد الركراكي: "بوفال كان الجوكير ديالي، ولعب مزيان فالماتشات اللي لعب ولكن ما كتابش له حتى هو، وهادي هي المسابقة وما غنتخباش ورا هذا الشي، وكانوا عندنا الاحتياطين وكنت مؤمن غيعطيونا لوبليس ولكن تقصينا وانا اللي غالط".