جريمة خايبة غادي تنوض الصداع على لعرب.. بوليس الطاليان شدو 7 مهاجرين مصريين اغتاصبو بنت عندها 13 عام

شدو البوليس ديال الطاليان 7 ديال المهاجرين من الجنسية المصرية، متاهمين باغتصاب واحد البنت عمرها غير 13 عام طاليانية، والقضية منوضة روينة فالبلاد.
على حساب مقالت الصحافة الإلكترونية فالجريمة وقعات في 30 من شهر يناير لي فات، والبنت مشات بلغات بالمغتصبين ديالها بعدما قدرات تهرب منهم.
من بعد ساعات قليلة من التبليغ ديال البنت، قدر البوليس يشد المغتصبين ب7 بيهم بعدما تعرفات عليهم كاملين.
دابا القضية منوضة روينة كبيرة فالبلاد ودخلو فيها مسؤولين كبار من بينهم رئيسة الوزارء جورجيا ميلوني لي قالت أنها "مصدومة بزاف من داكشي لي شافت وقرات"، وقالت أن "الدولة معاها وغادي تعاقب المجرمين".
ماتيو سالفيني، النائب ديالها والمعروف بالمعاداة ديالو للمهاجرين مازكلش هاد المناسبة باش يتدخل وقال بللي المجرمين كاملين خاص يعاقبوهوم بالإخصاء الكميائي.