أكرد: الاتهامات اللي تقالت على الركراكي كذوب والسيد عكس هادشي.. لا للكراهية والعنصرية بين المغاربة والكونگوليين اللي كنحتارموهم بزاف

خرج الدولي المغربي نايف أكرد يدافع على الناخب الوطني المغربي وليد الركراكي، بعدما اتهموه الكونگوليين بأنه تعدى على اللاعب ديالهم مبيمبا فماتش المنتخبين البارح الاحد، فكوب دافريك فالكوت ديفوار.
وخرج نايف أكرد قبل لحظات كيدافع على وليد الركراكي وقال سطوري فأنستغرام: "البارح، بعد الاجتماع، لاحظت للأسف أن الأمور خسرات شويا بسبب المشاحنات فوسائل التواصل الاجتماعي وحتى الصحافة.. المشادات شي حاجة طبيعي فماتش الكورة".
وكمل أكرد: "اللي بقى فيا وقلقني هو اتهام المدرب وليد الركراكي بالكذوب وشي حوايج اللي ماشي فيه وما عندها علاقة بالمبادئ ديالو وهذا الشي ضرني فخاطري بزاف".
وزاد وضح نايف أكرد: "السكات على هذا الشي غلط حيث كيأدي للفهم الغلط وهذا الشي كيتسبب فالانقسامات، وكنعرف وليد الركراكي ملي كانت عندي 17 عام، وهذاك الشي اللي اتهموه به البارح هو عكس الشخصية ديالو".
وأكد نايف أكرد: "هذا الشي مخزٍ خاصك تعطي له بالظهر، لا للكراهية بين البلدين (المغرب والكونگو) ولا للعنصرية ولا للتشهير وراني كتبت هذا الميساج بالفرنسية باش خوتنا الكونگوليين اللي كنحترموهم بزاف يفهمونا".