الكعبي: غنمشيو للكوت ديفوار باش نفرحو ونفرحو المغاربة اللي كيستاهلو كل الحب

أكد الدولي المغربي أيوب الكعبي أن الاستعدادات كتدوز مزيان فمعسكر المنتخب المغربي تحضيرا لكوب دافريك، وأن اللاعبين باغيين يمشيو للكوت ديفوار باش يحققو نتائج تفرح المغاربة.
وتحدث أيوب الكعبي، خلال الحصة التدريبية الثانية للمنتخب المغربي فمركز محمد السادس لكرة القدم اليوم الأربعاء، وقال للموقع الرسمي ديال الجامعة: "التداريب كتدوز فأجواء إيجابية، ونتمناو نديرو نتيجة إيجابية فكوب دافريك بالكوت ديفوار اللي تفرحنا وتفرح الجماهير المغربية".
وكمل الكعبي وقال: "الاستعدادات كتدوز فجو زوين وكاينة طاقة إيجابية وسط اللاعبين وإنشاء الله نتمناو تكون شي حاجة زوينة، حنا اللاعبين خوت مع بعضياتنا فالمنتخب وعائلة وهادشي كيبان فالتيران ونتمناو نبقاو غاديين فنفس النهج ونفرحو الشعب المغربي اللي كيستحق كل الحب والتقدير".