واش ضغطات ميريكان على البوليساريو باش توقف استفزازاتها شرق الجدار الرملي قبل زيارة جوشوا هاريس ؟

Elouali.zaz.1987@gmail.com
اليوم الخميس الموافق ل 7 دجنبر 2023 غادي نوصلو لعشرة أيام متتالية البوليساريو ما كتخرج البوليساريو فيها أي بيان عسكري كتقول فيه بانها دارت "اقصاف" شرق الجدار الرملي، بحيث توقفات عن نشرها منذ بيانها الاخير نهار الإثنين 27 نونبر 2023.
توقف هاد البيانات على الرغم من عدم أهميتها عندو إيحاءات كبيرة دابا عاد توضحات مع الجولة لي كيدير نائب مساعد وزير الخارجية الأمريكية، جوشوا هاريس، للجزائر والمغرب، بحيث توحي هاد الزيارة أن الولايات المتحدة الأمريكية كان عندها دور مباشر فتوقف "الإستفزازات".
أي أن الإستنتاج لي كاين هو أن ميريكان ضغطات على البوليساريو توقف "الإستفزازات" شرق الجدار الرملي، وحتى بياناتها لي تجاوزات 900 بيان منذ 13 نونبر 2020، وأن البوليساريو ومن وراها الجزائر رضخو بجوج لهاد الضغط باش تقدر تدفع بالعملية السياسية، وهادشي ممكن اننا أيضا نستخلصوه من بيان الخارجية الأمريكية نفسها لي قالت فيه: "وصل نائب مساعد وزير الخارجية جوشوا هاريس إلى الجزائر العاصمة لبدء جولة من المشاورات مع الجزائر والمغرب بشأن تعزيز السلام الإقليمي وتكثيف العملية السياسية التابعة للأمم المتحدة في الصحراء الغربية للتوصل إلى حل دائم وكريم دون مزيد من التأخير" ونسطرو على مسألة "تعزيز السلام الإقليمي" لي مرتابطة بوقف أشكال الإستفزاز بالنسبة للبوليساريو.
دابا البوليساريو فموقف محرج مع رأيها العام لي كتروج ليه أنها كتخوض حرب مع المغرب، ولكن كيبقى نعرفو توقف هاد الأعمال الإستفزازية حتى لإمتى غادي يستامر وواش غادي يبقى حتى من بعد إستئناف العملية السياسية لي بغات ميريكان تطلقها فأسرع وقت تفاديا للإحراج وممكن تنجح فإطلاقها سواء بصيغة موائد مستديرة أو بصيغة أخرى.