الكاظيمي ل"كود" على دور بروال ف"الفيشطا": تجربة فيها تمارا

الفنان كمال الكاظيمي ولد المسرح قبل ما يخطفو شوية التلفزيون. قبل من حديدان كان كيدير المسرح. كيعشقو وكيموت عليه.
فمسرحية "الفيشطا" اللي تعرضات لخميس للي فات فالرباط والبارح الجمعة فكازا لعب دور بروال اللي مشى ليه اسمو وحياتو ولى عبد عند الباشا.
دور دارو باحترافية. قدر يوصل طباع الشخصية وتناقضاتها وامالها والامها. فتصريحو ل"كود" قال كاظيمي باللي هاد الدور تسخسخ فيه شويا "كانت تجربة فيها شوية تمارا. بدلنا مجهود كبير" يشرح الفنان اللي كيتمنى يكون هو وزملاؤو فالمسرحية يكونو توفقو
الفنان حس باللي فالعرض الاول اللي كان فمسرح محمد الخامس فالرباط نجح "كيقولو باللي جمهور دالرباط هو الامتحان. العرض قدامو بحال ايلى كدوز فالامتحان". التصفيق والتفاعل مع العرض بين باللي العمل اللي دار ليه الاخراج امين ناسور٬ وصل لقلوب المئات اللي جاو حضرو.