الرجاء خداو الصدارة بوحدهم بعدما ربحو المحمدية ودارو الضغط على ليفار وبركان وحتى الوداد

انفرد فريق الرجاء الرياضي بصدارة البطولة الاحترافية لكرة القدم، بعدما ربح اليوم الاحد فريق شباب المحمدية فتيران العبدي بالجديدة، ضمن منافسات الدورة 10.
وسالا الماتش بين الرجاء الرياضي وشباب المحمدية بنتيجة واحد لزيرو لمصلحة الفريق الاخضر، وتسناو النسور الشوط الثاني من المباراة باش قدرو يماركيو هدف الرباح من بيلانتي سجلو بنجاح نوفل الزرهوني فالدقيقة 63 من اللقاء.
وبهاد الرباح تصدر فريق الرجاء الرياضي ترتيب البطولة الاحترافية بعدما خدا 3 بوان رفع بها الرصيد ديالو إلى 20 نقطة، ودار الضغط على كل من ليفار ونهضة بركان اللي تراجعو مؤقتا إلى المركز الثاني برصيد 17 نقطة، في انتظار يلعبو هاد الدورة، وأيضاً الوداد الرياضي اللي عندو 3 مؤجلات.
أما بالنسبة لشباب المحمدية، فهاد الخسران هو السادس له هذا الموسم مقابل 2 ربحات و2 تعادلات، والفريق كيحتل مؤقتا المركز 11 برصيد 8 النقاط.
للإشارة فالماتش بين الرجاء الرياضي وشباب المحمدية، عرف حضور ضعيف بزاف ديال الجماهير، حيث إلترات الفريق قررت تقاطع المباراة، احتجاجاً منها على ثمن التذاكر اللي دارتو إدارة النادي لحضور اللقاء فتيران العبدي بالجديدة، واللي تحدد ما بين 70 و1000 درهم.