من بينهم 2 دراري صغار.. راجل كبير فتركيا قتل 5 جيرانو بفردي بسباب الصداع

سالات واحد المضاربة بين الجيران فواحد العمارة فالعاصمة التركية أنقرة بمجزرة ديال بصح، ماتو فيها 5 دالناس من بينهم 2 ديال الدراري الصغار.
على حساب ما قالت مواقع صحفية تركية، هاد الجريمة الخايبة وقعات البارح الأربعاء، بعدما خرج واحد الراجل كبير فالعمر عند جيرانو كيقول ليهم نقصو عليا الصداع ديالكم.
الجيران لي كيديرو الصداع معجبهومش الحال وردو على صاحبنا بطريقة خايبة، وهو يرجع لدارو جبد فردي وتيرا فيهم كاملين، منهم جوج الدراري الصغار.
الراجل لي متهم بالقتل عندو 72 عام، وهزوه البوليس مباشرة للكوميسارية.