الركراكي على إبراهيم دياز: أنا مركز مع اللاعبين اللي اختارو يلعبو للمغرب

أكد الناخب الوطني وليد الركراكي أنه مركز مع اللاعبين اللي اختارو يلعبو مع المنتخب الوطني المغربي، وماشي اللي مترددين، وأن الدور ديالو اعيط ويقنع اللاعبين اللي الوالدين ديالهم مغاربة، ولكن خاص يكون عندهم استعداد باش يلعبو للمغرب ومقتانعين.
وتكلم وليد الركراكي على نجم ريال مدريد الإسباني إبراهيم دياز وعلاش مازال ما جا للمنتخب ومازال ما عطيش له وقال: "هضرت على ابراهيم دياز مدة هادي، ملي كتبغي تجي ليكيب ناسيونال خاصك تكون مقتنع بلي ليكيب ناسيونال غتعطيك وانت غتعطي ليكيب ناسيونال، أنا دابا مركز مع اللاعبين اللي كيكونو معنا واللي اختارو بحال عدلي بحال ديوب بحال حارث وزياش اللي اختارو المغرب".
وكمل الركراكي: "هذا اختيار القلب، وأنا الدور ديالي كناخب وطني نهضر مع اللاعبين اللي والديهم مغاربة باش نشوف الاستعداد ديالهم باش يلعبو معنا وإذا شفتو ابراهيم دياز هنا عرفو بلي هو مقتانع يلعب مع المنتخب المغربي".