الوداد غيسافرو فطيارة أجنبية لجنوب إفريقيا حيث سلطات الأخيرة ما بغاتش ترخص لطيارة مغربية

تدخلت اللجنة المنظمة للسوبر ليك الإفريقي باش يلقى حل للديبلاصمون ديال الوداد الرياضي إلى جنوب إفريقيا، استعدادا لمواجهة فريق ماميلودي صن داونز الجنوب إفريقي برسم إياب المسابقة بسبب عراقيل السلطات الجنوب إفريقية.
وكان من المنتظر تسافر بعثة الوداد الرياضي إلى جنوب إفريقيا فطيارة ديال الخطوط الملكية المغربية، ولكن السلطات الجنوب إفريقية مانعة الطيارات المغربية من الدخول لمجالها الجوي والنزول فالأراضي ديالها وما بغاتش تعطي ترخيص للطيارة المغربية.
ودابا تدخلت اللجنة المنظمة للسوبر ليك الإفريقي باش توفر طيارة أجنبية تنقل الوداد الرياضي من المغرب إلى جنوب إفريقيا، فالوقت اللي محدد الفريق الأحمر موعد السفر الثلاثاء المقبل.
وباغيين يسافرو الوداد الرياضي على تيساع على بريطوريا الجنوب إفريقية باش يوجدو على خاطرهم لإياب السوبر ليك الإفريقي اللي غيتلعب الاحد الجاي، مع العلم أن ماتش الذهاب اليوم الاحد فستاد دونور.