بدوي عتق الرجاء من اول خسارة فالبطولة بهدف قاتل على أولمبيك أسفي والنسور كيواصلو تضييع النقاط

تعتقو الرجاء الرياضي من أول خسارة فهاد الموسم، وخرجو بالتعادل مع اولمبيك اسفي اليوم السبت فتيران مراكش الكبير، برسم الدورة 7 من البطولة الاحترافية.
وسالا الماتش بين الرجاء وأولمبيك اسفي بنتيجة التعادل الايجابي 2 لجوج، وكانوا الرجاويين هما الأولين اللي ماركاو فالماتش بهدف ديال محمد مكعازي فالدقيقة 48، وأولمبيك اسفي ضربو التعادل فالدقيقة 51 من بلانتي ماركاه لهم سهيل بنيشو، ورجعو المسفيويين زادو الهدف الثاني فالدقيقة 81 بواسطة ابراهيم البحراوي، وكانوا فطريقهم للرباح ولكن عبد الصمد بداوي عتق الرجاء من الخسران وضرب لهم التعادل بهدف ثاني فالدقيقة 90.
وراه واخا الرجاء الرياضي تعتقو من الخسران ولكن بهاد التعادل مع اولمبيك اسفي كيواصل الفريق مسلسل تضييع النقاط، وهذا هو التعادل الرابع له هذا الموسم من اصل 7 الماتشات لعبهم مقابل 3 الرباحات، والفريق عندو دابا 13 نقطة وكيحتل مؤقتا المركز الرابع، أما أولمبيك اسفي عندهم 8 النقاط وكيحتلو المركز 10.