الرجاء رجعو للتعادلات والحسنية مستمرين فالنتائج السلبية.. الفريقين تعادلو فماتش تزكلو فيه كفاف ديال الأهداف

رجعو الرجاء الرياضي لمسلسل التعادلات وحسنية أكادير واصلو النتائج غير المقنعة، بعدما تعادلو الفريقين فالماتش اللي لعبوه بجوج اليوم الاحد ضمن الجولة 5 من البطولة الاحترافية لكرة القدم.
وسالا الماتش بين الرجاء الرياضي وحسينة أكادير اليوم فتيران أدرار بنتيجة واحد لواحد، وكانو حسنية أكادير هما اللولين اللي ماركاو بواسطة محمد باخاش فالدقيقة 29، بعدما استغلو لاعبين الحسنية سوء تموقع مدافعين الرجاء وفشلهم فتطبيق التسلل، وبالمقابل الرجاويين خلقو عدد من الفرص ولكن ما قدروش يماركو التعادل.
وفالشوط الثاني قدرو الرجاء الرياضي يرجعو فنتيجة الماتش بهدف ماركاه يسري بوزوق فالدقيقة 56، وحاولو الفريقين بجوج يماركيو من بعد منها وخصوصا الرجاء ولكن ما قدروش وسالا الماتش تعادل.
وبهذا التعادل خداو الرجاء وحسنية أكادير نقطة لكل واحد منهم، ورفعو الرجاء رصيدهم إلى 9 نقاط وكيحتلو المركز الثالث، أما حسنية أكادير عندهم غير 2 نقاط وكيحتلو المركز 14.