بعدما خسروا العصبة.. الوداد ضيعو ثاني الرباح مع الحسنية فالبطولة وبعدو عليهم ليفار اللي ربحو خريبكة

كيواصل الوداد الرياضي حصد النتائج السلبية، وبعدما خسر لقب عصبة أبطال إفريقيا الأحد الماضي، ضيع اليوم الأربعاء 2 نقاط مهمة فلاكروس على البطولة الاحترافية، بعدما تعادل مع الحسنية بأكادير.
وسالا الماتش بين الوداد الرياضي وحسنية أكادير بنتيجة التعادل السلبي زيرو لزيرو، واخا المحاولات ديال الوداديين باش يماركيو والحسنية فليكونتر أتاك، بقات النتجية كيفما هي حتى سالات المواجهة بين الفريقين.
وبهذا التعادل بعد الوداد الرياضي بفارق 3 النقاط على الجيش الملكي المتصدر حيث الأخير ربح الماتش ديالو مع أولمبيك خريبكة بواحد لزيرو فتيران مولاي عبد الله بالرباط عن نفس الجولة وفنفس التوقيت، وصبح عند الواك 57 نقطة مقابل 60 نقطة عند ليفار، أمام حسنية أكادير ولات عندهم 32 نقطة وكيحتلو المركز 10.