لقجع للإعلام الإسباني اللي كيكذب فقضية دياز: واش كاين شي لاعب فتاريخ إسبانيا سميتو ابراهيم

عطا فوزي لقجع رئيس الجامعة الملكية المغربية درس للإعلام الإسباني اللي كيحاول يضغط فملف اللاعب إبراهيم دياز نجم ريال مدريد الإسباني، وتعجب وقال واش عمر إسبانيًا كان فيها شي لاعب سميتو ابراهيم.
وتحدث فوزي لقجع فتصريح له وقال: "على عكس ما تتداوله الصحافة الإسبانية من أخبار أقل ما يمكن أن أصفها به أنها رديئة على أن المغرب يحاول ويفعل إلى غير ذلك، وأنا أتحدى أي لاعب مغربي أن المغرب مارس عليه ضغوطات أو مارس عليه مساومات بشكل او بأخر".
وكمل لقجع: "اللاعب هو اللي كيتشرف بحمل القميص الوطني المغربي، أولا رياضيا المنتخب الوطني لعب الدومي فينال وإسبانيا تقصات وعلى يد الفريق الوطني المغربي من دور الثمانية، وثانيا هذا الفريق الوطني المغربي اليوم عندو مشروع، المنتخب المغربي كيخدم فظروف إذا كانت ماشي أحسن من ظروف منتخبات أوروبية على الأقل هي فنفس المستوى وان زرت مقرات إسبانيا والبرتغال وغيرها كنعرف ظروف الاشتغال".
وزاد وضح لقجع: "وثالثا اللاعبين اللي كيلعبو فالمنتخب الوطني المغربي اليوم لا يقلون أهمية عن أي لاعب آخر حكيمي كيلعب فباريس سان جيرمان، ومزراوي فبايرن ميونخ، وحارث وأوناحي فمارسيليا وغيرهم من الأسماء، حنا المغاربة الخطاب ديالنا واضح وكنطرحو السؤال على هاديك الصحافة اللي كتناول الأخبار الرديئة، واش فتاريخ المنتخب الإسباني كان شي لاعب سميتو إبراهيم.. هذا لاعب مغربي كيلعب فأوروبا وعندو الجنسية المغربية، وراه عندنا لاعبين اللي عندهم 4 دالجنسيات، راه المنتخب المغربي للمغاربة فينما كانو".