الوداد غيساليو الاستعدادات لماتش هافيا والفريق الغيني وصل معطل لكازا

غيسالي الوداد الرياضي اليوم الجمعة الاستعدادت ديالو لمواجهة هافيا كوناكري الغيني، ضمن إياب دور 32 من عصبة أبطال إفريقيا، وهو الماتش اللي غيتلعب غدا السبت فستاد دونور مع 8 الليل.
عادل رمزي مدرب الوداد الرياضي برمج حصة تدريبية للفريق اليوم الجمعة بالليل فتيران بنجلون بالدار البيضاء، وفيها غيخدم مع اللاعبين على آخر الروتوش والتكتيك اللي غيلعبو به ضد هافيا كوناكري، ومن المنتظر تعرف الحصة التدريبية حضور اللاعبين كاملين اللي مكونفوكين فاللائحة الأفريقية باستثناء جمال حركاس اللي غيكون فلاليست ملي يتأهل الفريق إلى دور المجموعات.
من جهة أخرى، وصل فريق هافيا كوناكري معطل للمغرب، ويالاه حطات طيارتو غير فالساعات الأولى من صباح اليوم الجمعة فمطار محمد الخامس بالدار البيضاء، وغيدير الفريق الغيني غير حصة تدريبية واحدة قبل من الماتش مع الوداد الرياضي، غتكون هذه العشية فتيران محمد الخامس بالدار البيضاء اللي غيتلعب فيه الماتش غدا، وهذا الشي يقدر يؤثر على الفريق وعلى الجانب البدني فالماتش.
ومطالب الوداد الرياضي بأنه يحقق الرباح على هافيا كوناكري الغيني غدا السبت فستاد دونور، ضمن إياب دور 32 من عصبة أبطال إفريقيا، باش يضمن التأهل إلى مرحلة المجموعات للمرة العاشرة فالتاريخ ديالو كأكثر فريق مغربي كيحقق هذا المعدل، وما يخلي حتى شي فرصة للخصم فين يدير المفاجأة واخا راه نتيجة التعادل السلبي زيرو لزيرو غتأهلو بعدما سالا ماتش الالي تعادل واحد لواحد، ولكن الوداديين ما غيرضاوش غير بالرباح.