أشرف حكيمي مهدد بالعقوبة ففرنسا.. لجنة الانضباط عيطات له باش يدوز عندهم هو لاعبين فباريس سان جيرمان

كيفما كان متوقع، فالعقوبة كتسنا النجم المغربي أشرف حكيمي ومعه 3 لاعبين آخرين من باريس سان جيرمان الفرنسي، بسبب واقعة كلاسيكيو فرنسا أمام أولمبيك مارسيليا فالبطولة الفرنسية الويكاند اللي فات، بعدما بداو كيغنيو شي أغاني فيهم السبان والمعيار.
لجنة الانضباط فرابطة البطولة الفرنسية لكرة القدم، صيفطت استدعاء للاعبين باريس سان جيرمان، وكيتعلق الأمر بكل من النجم المغربي أشرف حكيمي والفرنسيين عثمان ديمبيلي، وكولو مواني، ولايفين كورزاوا، للمثول قدامها بسبب الأغاني اللي غناو ضد أولمبيك مارسيليا واللي فيها كلمات وعبارات مهينة.
وحددت اللجنة يوم 5 أكتوبر الجاي مع 6 العشية، كتاريخ وموعد باش يدوزو عندها اللاعبين بربعة، وأكدت أن قرار استدعاؤهم جا بعدما توصلت بتقرير ديال مندوب الماتش، اللي دون أن اللاعبين صدرت منهم عبارات مهينة بعدما سالا الماتش ملي كانوا كيحتفلو بالرباح مع جمهورهم.
وكانوا اللاعبين ديال باريس سان جيرمان بربعة بانوا ففيديو كيغنيو مع جمهور PSG، ملي سالا الماتش شي أغنية كيكلاشيو بها أولمبيك مارسيليا، وهي أغنية شابعة معيار وسبان فمارسيليا والجمهور ديالها، ونعتوهم ب "ولاد العاهرات".
للإشارة، فالنجم المغربي أشرف حكيمي تألق بشكل كبير البارح الاحد الماضي فكلاسيكو فرنسا بين باريس سان جيرمان وأولمبيك مارسيليا، وهو اللي ماركا الهدف الأول لPSG، من كوفرة واعرة فالدقيقة 8، والمانش ربحوه بنتيجة 4 لزيرو.