بسبب "تغول" بنسعيد فالعاصمة.. مستشارو الأحرار باغين عمدة "قوي" بلاصت اغلالو للي خوات التيران للمهدي بنسعيد وكيبان السياسي القوي فالرباط

كشفت مصادر حضرت للقاء لي جمع بين قيادة حزب الحمامة برئاسة عزيز أخنوش مع المستشارين الغاضبين من عمدة الرباط أسماء اغلالو، يوم الثلاثاء الماضي، بلي من بين الأسباب لي خلاتهم يكعاو هو أن العمدة خوات التيران وخلات المهدي بنسعيد هو اللي كاين فالساحة.
مستشارو الحمامة بالمجلس الجماعي للرباط قال لقيادة الحمامة بلي: "اغلالو مكتقضي أغراض ولا والو للساكنة، وبنسعيد هو لي كيبان فالواجهة وخدام مع المستشارين وهو لي غايجيب الانتخابات الجايا يلا بقينا فهاد الوضع".
وعلمت "كود" بلي أخنوش وضع ثقته في سعيد التونارتي رئيس فريق مستشاري حزب التجمع الوطني للأحرار بجماعة الرباط، وخبرو بلي اتصل به مباشرة يلا محتاجين أي حاجة فالرباط، هادشي غضب العمدة اغلالو.
بل أكثر من ذلك، الإجماع لي كاين ضد اغلالو، داخلين فيه كذلك أصحاب المصالح لي تضررو بسبب كثرة الضرائب لي دارت عليهم.
التجار ونقابة ديالهم ولوبي المطاعم والبيران كولشي كاعي عليها، حسب مصادر "كود"، "عيقات عليهم بالضرائب الكثيرة وهادشي مداروش البي جي دي لي عندو أفكار ضد الشراب".
ونبه مستشارو الحمامة من "تغول" اسم بنسعيد في العاصمة، وهو ما يعني أنه يستعد ليكون عمدة في المستقبل، مستغلا منصبه الوزاري ومكانته داخل البام.