تنظيم باهث لمعرض الكتاب والأشغال باقا مسالاتش وإسرائيل لي درنا معها اتفاقيات غايبا وامنستي لي دارت حرب على المغرب حاضرة

تنظيم ضعيف باهث، معرض بدون روح، فاش كادخل ليه كتحس بلي كولشي جامد، حتى أن البلاصة فين دار بعيدة ومعزولة وماقريباش المقاهي والمطاعم والبيران.
معرض مافيهش الحياة، اول تواجد ل"گود" ف المعرض لاحظنا المكان المخصص للصحافة جا فبلاصة قريبة لباب اوطيل سوفيتيل وفيها گرياج كبير ومكاينش علاقة بلي الباب مخصص للصحافة.
ف الداخل ديال معرض كاينين أروقة دول، بحيث عاينت گود غياب دولة إسرائيل لي وقعنا معها اتفاقيات مهمة في المجالات الاقتصادية والتجارية والاستثمارية والثقافية، فالمقابل معرض منظمة امنستي كاين رغم الحروب لي دارت هاد المنظمة ضد المغرب فقضية التجسس ببرنامج بيغاسوس الإسرائيلي.
من جهة أخرى، اليوم فالعشية جا الوزير المعني بالقطاع المهدي بنسعيد رفقة أسماء اغلالو عمدة العاصمة والوالي محمد اليعقوبي. زيارة خاطفة كتحس بلي مافيهش دفء، كانت صحافة كتصور كولشي كيدوز بسرعة.
قضية أخرى لي أثارتها "گود" ديال منع كتاب مذكرات مثلية، مصدر كشف بلي أسباب منع الكتاب واخا صحيحة ماشي هي الدافع ديال المنع بل ضغط الفايسبوك وخايفين من الضجة. طبعا بنسعيد خضع لهادشي ولقا مبرر باش يمنع الكتاب.