الركراكي كان حاضر فماتش ريال مدريد وسوسيداد وها علاش

حضر الناخب الوطني وليد الركراكي ماتش ريال مدريد وريال سوسيداد البارح الاحد فتيران سنتياكو برنابيو، ضمن منافسات البطولة الإسبانية على قبل اللاعب د الريال ابراهيم دياز اللي مازال ما حسم القرار مع من غيلعب واش المغرب ولا إسبانيا.
وكشفت جريدة "أس" الإسبانية، أن الناخب الوطني وليد الركراكي كان وسط الجمهور اللي حضر ماتش ريال مدريد مع ريال سوسيداد، باش يراقب ابراهيم دياز لاعب ريال مدريد مول 24 عام.
وزاد وضح نفس المصدر، أن الهدف من زيارة وليد الركراكي هو يقنع ابراهيم دياز باش يلعب مع المنتخب المغربي، وأن الركراكي كان محظوظ حيث اللاعب دخل فالدقيقة 87 من الماتش باش يشوف شويا من النيفو ديالو.
وكملت الجريدة الإسبانية، وقالت إن وليد الركراكي والجامعة الملكية المغربية لكرة القدم، مازال صابرين فقضية ابراهيم دياز وعندهم أمل، حيث اللاعب كيستنى يعيط ليه مدرب إسبانيا لويس دي لافونتي، واللي ما اتصلش به، وهذا الشي اللي باغيين يستغلوه باش اللاعب يحمل قميص الأسود.