ماركا: المغاربة خدامين باش ابراهيم دياز يلعب معهم.. ها شنو معطلو وها امتى يقدر يمشي يلعب مع الاسود

رجع اسم المغربي الاصل والاجداد ابراهيم دياز لاعب ريال مدريد اللي زايد فاسبانيا داير البوز تاني، بعدما خطف منو جوهرة البارصا المغربي الاصل لامين يامال الاضواء خلال المرحلة الماضية، واللي اختار يلعب مع المنتخب الاسباني البلاد اللي تزاد فيها.
جريدة "ماركا" الاسبانية، كشفت فتقرير حديد لها أن الجامعة الملكية المغربية لكرة القدم خدامة على ملف نجم ريال مدريد الاسباني ابراهيم دياز، باش يلعب مع المنتخب الوطني المغربي، ومعولة انه يشارك مع الاسود فكاس افريقيا عام 2024، ولو ان اللاعب مازال كيقلب يدير بلاصتو وسط ريال مدريد الاسباني اللي رجع له هذا الصيف، وهذا الشي كان كشف عليه موقع "كود" فوقت سابق.
المصدر الاسباني، وضح ان المشكل اللي كاين دابا هو ان ابراهيم دياز باغي يلعب مع منتخب اسبانيا، وانه كيتسناهم يعيطو عليه وكان معول على الناخب الاسباني لويس دي لافونتي يوجه له دعوة الالتحاق بلاروخا، وهذا الشي اللي مازال ما وقع وان المدرب الاسباني ما عيطش للاعب ملي وصل مع ميلان الايطالي لدومي فينال دوري ابطال اوروبا وحتى دابا وهو كيقلب يدير بلاصتو فريال مدريد، لكن المسؤولين المغاربة خدامين وباغيين ان ابراهيم عبد القادر دياز يلبس توني د المغرب بلاد والدين والاجداد ديالو.
الجريدة الاسبانية، اكدت ان الجامعة الملكية المغربية لكرة القدم، عندها هدف واضح خدامة عليه وهو يلعب ابراهيم دياز كاس افريقيا اللي غتكون عام 2024، وفحالة وافق اللاعب يلعب للمغرب فغيجي يلعب مع الاسود قبل من كوب دافريك، حيث مازال 2 مناسبات ديال تواريخ الفيفا للمباريات الدولية، خاص غير موافقة اللاعب على هذا الشي مع العلم ان المسؤولين المغاربة فتواصل مع اللاعب والعائلة ديالو ووراوهم المشروع اللي على قبلو باغيين ابراهيم دياز يلعب مع المنتخب المغربي.