"كود" من قلب دوار (دوار الصُّور) فالحوز: ها كيفاش السكان تصدموا من الزلزال والداخلية والبومبية دارو خيام للناس المتضررة وحضور هام للإعلام الدولي

على طول الطريق بين مراكش والحوز كاين حركية غير عادية. الطرقات كلهم عامرين بالشاحنات وحتى السيارات الخفيفة اللي كلهم هازين مساعدات إنسانية للسكان المتضررين من الزلزال اللي ضرب المنطقة.
"كود" دارت جولات كثيرة بعدد من الدواوير وخاصة "دوار الصُّور" اللي جاي فالدخلة الأولى ديال الدواوير المتضررة من هاد الكارثة الكبرى، ولقينا عشرات الخيم دارتها الداخلية والوقاية المدنية والناس كالسين فيهم مع ولادهم.
سولنا عدد من السكان اللي أكدوا باللي عاشو لحظات مروعة جرّاء المشاهد اللي عاشوها وماتوا ليهم أقربائهم، وفهاد الوقت اللي كانت "كود" كتهضر فيه من الناس شافت حضور بعض الوسائل الإعلام الدولية اللي كتواصل تغطية هاد الفاجعة المؤلمة.