ها جديد الوداد بعد ماتش المحمدية: رمزي باغي يستغل توقف البطولة ويوجد الفريق واخا عندو غيابات

غيرجعو الوداد الرياضي يتدربو استعدادا لاستئناف البطولة الاحترافية المتوقفة بسبب تواريخ الفيفا، وأيضا باش يوجدو لعصبة ابطال افريقيا اللي غيبداوها بمواجهة هافيا كوناكري الغيني يوم 17 شتنبر الحالي.
وبعدما استفدو لاعبين الوداد الرياضي من يومين للراحة من عياء ماتش الأحد الماضي أمام شباب المحمدية، غيرجع الفريق اليوم الأربعاء يتدرب وعندو حصة تدريبية فتيران محمد بنجلون بكازا، تحت إشراف المدرب عادل رمزي اللي غيوجد فيها اللاعبين بدنيا باش يبدا خدام معهم الايام المقبلة على تحسن التكتيك وخصوصا دفاعيا.
وبالنسبة لصفوف الوداد الرياضي، غتكون فيها غيبات هذه الأيام، بسبب التزام عدد من اللاعبين بالمنتخبات الوطنية، وكيتعلق الأمر بكل من الكول يوسف المطيع، يحيى عطية الله اللي مع المنتخب المغربي، وعبد الله حيمود اللي كاين مع المنتخب المغربي الأولمبي، أما المهاجم بولي صامبو راه مشى للمنتخب السنغالي اللي عيطو له، فالوقت اللي كاينة إصابة وحدة فالفريق وهي ديال منتصر الحتيمي ولكن ماشي صعيبة خاصها غير شويا الراحة.
ودائما مع الوداد الرياضي، من المنتظر يلعب الفريق شي مباراة ودية واحدة على الأقل خلال هذا التوقف الدولي، حيث المدرب عادل رمزي باغي يحدد 11 لاعب أساسي باش يلعب ملي تستأنف المنافسات واللاعبين اللي غيبقى يعاون بهم التشكيلة ملي يبغي يدور الفريق، باغي يعطي فرصة لجميع اللاعبين باش يبينو شنو عندهم وباش عينفعوه..