الإبراهيمي مهدد بالعقوبة.. نوضها هو والهبطي فالكلاسيكو د الرجاء وليفار

صبح عبد الإله الابراهيمي الناطق الرسمي ديال الرجاء الرياضي وعضو المكتب المديري للعصبة الوطنية لكرة القدم الاحترافية، مهدد بالعقوبة حيث ضارب مع زكرياء الهبطي لاعب الجيش الملكي فالماتش للي جمع الفريقين، اليوم الاحد فستاد دونور برسم الجولة 2 من البطولة الاحترافية.
وبعدما تطرد زكرياء الهبطي لاعب الجيش الملكي وملي كان غادي للكولوار اللي كيهبط للفيستيير ديال ستاد دونور، تلقا مع عبد الإله الإبراهيمي الناطق الرسمي للرجاء الرياضي، وتما، وحسب واحد الفيديو، بان بلي تعاير هو وياه ودفل عليه، فالوقت اللي كان عاطي الهبطي بالظهر ومبانش واش حتى هو دفل على الإبراهيمي أو لا.
وبحال هذا السلوك كيهدد عبد الإله الإبراهيمي بالتوقيف، وهذا الشي في انتظار رد فعل العصبة الوطنية الاحترافية لكرة القدم والقرار ديالها فالواقعة، مع العلم أن زكرياء الهبطي اللاعب السابق للرجاء ماركا التعادل على الرجاويين لمصلحة ليفار، ونوضها وتعايير مع الجمهور د الخضرا اللي حالفين عليه، وراه خرجوه بالتخبية فطوموبيل كحلة ملي سالا الماتش.
https://www.tiktok.com/@goud.ma/video/7274692300272356614?_r=1&_t=8fOEFsngFCY