بوخلال ماركا ثاني فتيرانات فرنسا وخا تولوز ضيعو الرباح مع كليرمون فوت

كيواصل الدولي المغربي زكرياء بوخلال التألق فالتيرانات الفرنسية، الفريق ديالو تولوز قنع بالتعادل مع كليرمون فوت، اليوم الاحد ضمن الدورة 4 من البطولة الفرنسية.
وسالا الماتش بين تولوز وكليرمون فوت بنتيجة التعادل 2 بيوتا لكل فريق، وكان النجم المغربي هو اللي ماركا الهدف الأول فالماتش لمصلحة تولوز فالدقيقة 8، وعزز له فرانك ماجري النتيجة بهدف ثاني فالدقيقة 14، ولكن كليرمون فوت رجعو وماركا لهم كريكون كيي الهدف الأول من بيلانتي فالدقيقة 34، وملي قرب يسالي الماتش خطف فلوران أويير هدف التعادل لكليرمون فوت وحرم تولوز من الرباح.
زكرياء بوخلال بهاد الهدف اللي ماركا اليوم فماتش تولوز وكليرمون فوت، ولا كيحتل المركز الثاني فترتيب هدافين البطولة الفرنسية لهذا الموسم، وراه ماركا 3 البيوتا في 4 الماتشات لعبوهم تولوز حتى لدابا فالبطولة.