بونو تألق فكلاسيكو السعودية بين الهلال والاتحاد.. زمط حمد الله وبنزيما وحبس أهداف حقيقة

كيواصل الكول المغربي ياسين بونو التألق بالمستوى الكبير ديالو، وساهم فالرباح ديال فريق الهلال على اتحاد جدة فريق النجم المغربي الاخر عبد الرزاق حمد الله، اليوم الجمعة فتيران عبد الله الفيصل فماتش مثير برسم الدورة 5 من منافسات البطولة السعودية.
وسالا كلاسيكو السعودية بين الهلال واتحاد جدة بنتيجة 4 مقابل 3، وكانو الاتحاد هما الاولين اللي ماركاو بواسطة رومارينيو فالدقيقة 16، قبل ما يتعادلو الهلال بهدف ماركاه أليكسندر ميتروفيتش فالدقيقة 20، وبعدها تكاو الاتحاد على الهلال وضربو عليهم 2 بيوتا ماركاهم كل من كريم بنزيما فالدقيقة 38، وعبد الرزاق حمد الله فاللحظات الاخيرة من الشوط الأول، مع العام أن ياسين بونو ما كيتحمل حتى مسؤولية فالاهداف اللي تماركاو على الهلال، حيث كلهم جاو من اخطا دفاعية فالتمركز والتغطية والتمرير، وكون ما بونو كانو غيتماركاو كثر من 3 اللبيوتا على الهلال، حيث بوحدو حبس كثر من 3 انفرادات ديال بنزيما وحمد الله.
ومن بعد التألق ديال ياسين بونو اللي خلا الهلال فالماتش واخا النتيجة 3 لواحد، قدر الفريق الازرق يرجع فالماتش وماركا 3 الاهداف ماتابعين، بواسطة أليكسندر ميترفيتش اللي رجع ضرب الهدف الثاني والتعادل فالدقيقة 60 و 65، وبعدها ماركاو الهلال التعادل بواسطة سالم الدوسري فالدقيقة 71، هذا الريمونتادا ديال الهلال خلات الاتحاد واللاعبين ديالو يخرجو يظغطو ويقلبو على التعادل ولكن ياسين بونو قدر يتصدى لاهداف محققة لحمد الله وبنزيما وصحابهم، ويساهم بشكل فعال وبدور كبير فخروج الهلال رابح من الكلاسيكو السعودي.
وبهذا الرباح خذاو الهلال السعودي بقيادة ياسين بونو 3 بوان مهمة رفعو بها رصيدهم إلى 13 نقطة وطلعو لصدارة بطولة السعودية مؤقتا، أما اتحاد جدة والنجوم ديالو حمد الله وبنزيما وصحابهم بقات عندهم 12 نقطة، ومشات لهم الصدارة ورجعو مؤقتا من المركز الاول إلى الثاني.