مامات روبياليس مول البوسة سدات عليها فكنيسة ودارت اضراب على الماكلة.. قالت لهم ما تخرج حتى ياخذ ولدها براءة

كيبان ان قضية بوسة لويس روبياليس رئيس الاتحاد الاسباني لكرة القدم للاعبة اسبانيا جيني هيرموسو، فالفينال ديال مونديال العيالات متشعبة وما غتساليش دغيا، وكل مرة غيبان فيها تطور وحادث جديد.
هذه المرة جات نوبة أنجيل بيجار أم لويس روبيلياس، واللي دخلت لواحد الكنيسة كيانة فموتريل حدا غرناطة باقليم الاندلس جنوب اسبانيا، وسدات عليها وكتعتبر ولدها مظلوم وان شي جهات دايرين عليه مؤامرة، وهذا الشي حسب ما كشفت عليه جريدة "ماركا" الاسبانية.
نفس المصدر، قال أن ام لويس روبيلياس قالت للمسؤولين على الكنيسة انها غتسد عليها وغدير اضراب على الطعام لا ماكلة لا شراب، حتى تبان البراءة ديال ولدها روبياليس وانه مظلوم، وطلبت من لاعبة المنتخب الاسباني جيني هيرموسو اللي باسها ولدها تقول الحقيقة.