فيورنتينا: إذا جا عرض مزيان فأمرابط غيمشي ما جاش غيبقى

أكد دانييلي براندي المدير الرياضي لفيورنتينا الايطالي فريق الدولي المغربي سفيان امرابط، أن الاخير باغي ينتقل لفريق كبير والنادي ما عندوش مشكل فهادشي ولكن بشرط يجيه عرض مزيان كليق بقيمتو.
وتحدث دانييلي براندي المسؤول بفيورنتينا، خلال ندوة دارها مع الاعلام الايطالي، وقال على وضعية النجم المغربي: "أمرابط باغي يلعب مع فريق كبير وباغيين نديرو له خاطرو، ولكن اذا ما جاش عرض مناسب غيبقى معنا، وما عندناش لاعب بحالو".
ومازال بزاف من متتبعين كرة القدم الاوربية فالعالم، كيتسناو باش غيسالي مسلسل النجم المغربي سفيان امرابط وفين غيمشي يلعب، وواش غينتقل من فيورنتينا الايطالي لفريق كبير ولا غيبقى معه، بعدما كان قريب يمشي البارصا ومانشستر يونايتد وليفربول وبايرن ميونخ واتليتيكو مدريد ومازال حتى صفقة فهادو ما صدقت.