أيت الحاج والشباك بتأثر: كنشكرو سيدنا وكل المغاربة اللي شجعونا كنا باغيين نزيدو نشرفو المغرب ولكن هادي هي كرة

عبرت لاعبات المنتخب المغربي على الأسف ديالهم حيث خسرو مع فرنسا فثمن نهائي كأس العالم للسيدات والإقصاء من المسابقة، وشكرو الملك محمد السادس على المساندة ديالو لهم والمغاربة اللي شجعوهم وطلبو منهم المسامحة.
وبعد نهاية ماتش المغرب وفرنسا، تحدثت حنان أيت الحاج لاعبة المنتخب المغربي فتصريح صغير وهي متأثرة وقالت: "كنشكرو سيدنا على الاهتمام والدعم اللي عطاه لكرة القدم النسوية وكنشكر اللاعبات على المجهودات ديالهم".
أما كابيتان ليكيب ناسيونال غزلان الشباك قالت: "ما كناش متوقعين هذه النتيجة ولكن درنا اللي علينا كنتمنى نكونو شرفنا كرة القدم النسوية المغربية والعربية درنا جهدنا".
وكملت الشباك: "اليوم خسرنا وهادي هي الكرة فيها الرباح والخسارة وكنشكر جميع الناس اللي شجعونا وعلى راسهم سيدنا اللي حفزنا من الأول وكان ديما واقف معنا، درنا باركور زوين وشرفنا المغرب وكنا باغيين نمشيو بعيد ولكن الكرة هي هادي".