ماتش للتاريخ فاديلايد الاسترالية. اللعابة الفرنسية ليا: لعابات ومدربين كيتعارفو وهنأت سارة وقلت ليها موعدنا لثلاث 8 غشت وباش ندخلو للتيران كنفكرو غير فالتأهل

ماتش المغرب ضد فرانسا غدا لثلاث 8 غشت 2023 بمدينة اديلايد الاسترالية عن ثمن نهاية كأس العالم ماشي ماتش عادي. ماتش للتاريخ. بزاف كيتعارفو من المنتخبين. فرانسيات وفرنساويين كيعرفو المغربيات والعكس صحيح. اللعابة الفرنسية ليا لو گاريك ذكرات٬ حسب موقع الاتحاد الفرنسي لكرة القدم٬ باللي كتلعب مع سارة الكاسي ف"فلوري". هاد اللعابة وحدة من 23 لعابة مغربية مشاركة فهاد المونديال.
ليا قالت باللي "سارة لعبات معاها فالفئات الصغرى" واضافت باللي باش المغرب تأهل٬ "رسلت ليها ميساج كنهنيها. جاوباتني. وقلنا موعدنا الثلاث".
واضافت باللي كاينة كنزة شاپيل مع المنتخب المغربي٬ واخا ما لعباتش بزافت الماتشات لحد الان.
اللعابة قالت باللي "باقي عندنا الوقت نداكرو بيناتنا =لعابات فرانسا ولعابات المغرب= باش نرجعو للفرقة ديالنا". وعبرات عن فرحتها بهاد المواجهة "بصدق فرحانة باش شفت المنتخب المغربي فثمن النهاية. كانت البدية صعيبة ضد لالمان٬ ولكن ما لاشاوش. واخا كلشي تقاتلو وجابو التأهل. هاد الشي كيبين جودة هاد الفرقة واصرارها. ما خاصش نقللو من شأنهم"
وذكرات بالي "المدربان واللعابات كيتعارفو. واخا هاد الشي ما كيبدل والو: هدفنا الوحيد الاوحد نربجو الماتش. باش ندخلو للتيران نسخنو حتى تصرف لاربيطة كنفكرو غير فالرباح"