أكد عادل رمزي مدرب الوداد الرياضي أن الفريق واجد لماتش الهلال السعودي، غدا الأربعاء ضمن الجولة الثالثة والأخيرة من مرحلة مجموعات كأس العرب، وأن الواك غيدخلو يربحو ولو أن الماتش غيكون صعيب ضد الهلال، وحتى واحد ما كان كيتوقع أن الفريقين غيكونو فهاد الوضع الصعب. وتحدث عادل رمزي خلال الندوة الصحافية اللي كتسبق ماتش الوداد الرياضي والهلال السعودي، وقال: "الماتش ديالنا غدا ضد الهلال السعودي هو أهم ماتش عندنا وخاصنا نربحوه إذا بغينا نتأهلو لربع النهائي". وكشف عادل رمزي: "الاستعدادت كتدوز فظروف مزيانة والجو العام جيد، الظروف كانت صعيبة فالجوج ماتشات الأولين سوا الوقت د الاستعدادت والتركيبة البشرية الجديدة للفريق أو الاتحاقي بالفريق، ولكن كيبان ليا تحسن فالتداريب وحتى فالاستعدادات د اللاعبين وراهم واجدين". وأكد رمزي: "فريق الهلال السعودي كيبقى فريق كبير، الماتش معه هو الصعيب، قدم ماتشات كبار ضد الأهلي الليبي والسد القطري ولكن ما كانش محظوظ، كلشي فالماتش ممكن، وحنا مستعدين بدنيًا وذهنيا باش نكونو فالمستوى". وختم مدرب الوداد وقال: "حتى حد ما كان كيتسنا أن الوداد والهلال يلعبو ماتش حاسم فهاد لكروب باش واحد من الفريقين يتأهل إلى الدور الثاني، ولكن هذه هي الظروف، والهلال فريق قوي وعندو إمكانيات كبيرة، المهم نقسو من خطورتهم ملي تكون عندهم الكرة وتكون عندنا الفعالية ملي تكون عندنا الكرة، ونصلحو أخطاءنا د الماتش الأول والثاني".
